ბავშვის მოვლა ბანაობა 12 სექ 2019 Share Share
ბანაობა
ბანაობა არა მხოლოდ ჰიგიენური პროცედურა, არამედ ერთგვარი რიტუალია–ესაა ემოციური კონტაქტი დედასა და ბავშვს შორის.
ბავშვის ბანაობისას გაითვალისწინეთ რამდენიმე წესი:
- პირველი 6 თვის განმავლობაში ბავშვი ყოველდღე აბანავეთ მხოლოდ წყლით, კვირაში 2-3–ჯერ სააბაზანო საშუალების გამოყენებით, 6 თვიდან 1,5 წლამდე –დღეგამოშვებით;
- უმჯობესია, ბავშვი აბანაოთ ძილის წინ, წყალი მოქმედებს დამამშვიდებლად;
- არ ჩასვათ აბაზანაში, თუ ბავშვს აქვს დიარეა, კანის ანთებითი დაავადება ან ტემპერატურა. ასეთ დროს საკმარისია წყლის გადავლება;
- ოთახის ტემპერატურა არ უნდა იყოს 24⁰ С–ზე ნაკლები;
- საბავშვო აბაზანაში წყალი ჩაასხით ნახევრამდე . წყლის თერმომეტრით გაზომეთ ტემპერატურა, ის უნდა იყოს 37⁰ С ;
- აბაზანის წყალს დაუმატეთ რამდენიმე წვეთი სააბაზანო საშუალება;
- ბანაობისას ერთი ხელით იჭერთ ბავშვის თავს და ზურგს, მეორე ხელის ხელისგულით ან რბილი ღრუბელით უსაპნავთ ტანს და სხეულის ნაკეცებს;
- საბავშვო შამპუნით თავის დაბანა შეიძლება კვირაში 1-2-ჯერ;
- წლამდე ასაკის ბავშვისთვის ბანაობის ხანგრძლივობა უნდა იყოს 5 – 10 წთ.;
- დაბანის შემდეგ, ბავშვი წყლიდან ამოიყვანეთ ზურგით ზემოთ და გადაავლეთ სუფთა წყალი;
- გაახვით ბავშვი რბილ პირსახოცში და ნაზად, მაგრამ საგულდაგულოდ გაამშრალეთ, რათა არ დარჩეს სისველე იღლიისა და საზარდულის ნაკეცებში;
- დაბანის შემდეგ წაუსვით სპეციალური კანის მოსავლელი საშუალებები.
მნიშვნელოვანია! სამშობიაროდან გამოწერის შემდეგ, ბავშვის ბანაობა შეიძლება მხოლოს ჭიპლარის ტაკვის მოვარდნის შემდგომ(მე-5-7 დღეს). მანამდე, საკმარისია კანის სველი ხელსახოცებით გაწმენდა.
იმისთვის, რომ ბავშვს წყლის შიში არ გაუჩნდეს, პირველი ბანაობა უნდა მოხდეს განსაკუთრებული ყურადღებით და სიფრთხილით.
- 6 თვემდე ბავშვის მდებარეობა აბაზნაში უნდა იყოს წოლითი. ამასთან, პატარას თავი ისე უნდა გეჭიროთ, რომ წყალი ყურებში არ ჩაუვიდეს. 6 თვის შემდეგ, ბავშვი შეიძლება ბანაობისას იჯდეს აბაზანაში, ისე, რომ წყალი წვდებოდეს მკერდამდე
- 2 თვიდან, როცა ბავშვი დამოუკიდებლად კარგად იჭერს თავს, ბანაობისას შეიძლება კისრის სპეციალური, გასაბერი რგოლის გამოყენება
ყოველი ჩასველების შემდეგ ბავშვი ჩაბანეთ 37-38⁰ С ტემპერატურის სუფთა წყლით. დეფეკაციის შემდეგ-დასაბანი საშუალებების გამოყენებით. გამშრალების შემდეგ კანის ნაკეცები დაამუშავეთ სპეციალური საბავშვო საშუალებებით (საბავშვო კრემი, რძე, საფენის ქვეშ წასასმელი კრემი და სხვა), რომლებიც არბილებენ და ატენიანებენ კანს, ამცირებენ მის გაღიზიანებას.