რჩევები დედებს დეპრესია 12 სექ 2019 Share Share
მშობიარობის შემდგომი დეპრესია
მშობიარობა სერიოზული სტრესია ორგანიზმისთვის, მათ შორის-ფსიქოლოგიური. ბავშვის დაბადების შემდეგვე ორგანიზმში მკვეთრად მცირდება ჰორმონების-ესტროგენის და პროგესტერონის დონე, რაც ერთ-ერთი ძირითადი მიზეზია ქალის დაქვეითებული ემოციური მდგომარეობისა მშობიარობის შემდგომ პერიოდში. ეს არის ე.წ. “ბეიბი ბლუზი”.
„ბეიბი ბლუზის“ ნიშნები
- გადაჭარბებულად ღელავთ ბავშვის ჯანმრთელობაზე მაშინ, როცა ერთი შეხედვით და ექიმის დასკვნით ყველაფერი წესრიგშია
- ხართ აფორიაქებული
- ვერ ახერხებთ კონცენტრირებას
- გიჭირთ დაძინება
- უმიზეზოდ გეტირებათ
ის, რომ “ცუდ ხასიათზე ხართ”, თქვენი ბრალი არაა, ეს ბუნებრივი მოვლენაა, პიკს მშობიარობიდან მესამე-მეოთხე დღეს აღწევს და რამდენიმე დღეში უკვალოდ ქრება. აუცილებლად გაუზიარეთ თქვენი გრძნობები ოჯახის წევრებს და მიიღეთ მათი დახმარება.
ბავშვი ძალიან მგრძნობიარეა დედის მდგომარეობის მიმართ. მათ შორის ხომ ძლიერი ემოციური კავშირია. ამიტომ საჭიროა დედა იყოს მშვიდი და ბედნიერი. მით უმეტეს, თუ ბავშვი ძუძუზეა - მას პირდაპირ გადაეცემა დედის ემოციები და განწყობა.
იმ შემთხვევაში, თუ უგუნებობა გრძელდება და თავს უფრო და უფრო ცუდად გრძნობთ, ეს შეიძლება მშობიარობის შემდგომი დეპრესია იყოს, რა დროსაც აუცილებელია სპეციალისტის ჩარევა.
მშობიარობის შემდგომი დეპრესიის ნიშნები:
- დეპრესიული განწყობა ან ხასიათის მკვეთრი ცვლილებები
- ხშირი, უმიზეზო ტირილი
- ოჯახის და მეგობრებისგან ცალკე ყოფნის სურვილი
- უმადობა ან გაძლიერებული მადა
- უძილობა ან ზედმეტი ძილიანობა
- ძლიერი დაღლილობის შეგრძნება და უღონობა
- მანამდე საყვარელი საქმიანობისგან სიამოვნების მიღების უნარის დაკარგვა
- ძლიერი გაღიზიანება
- ფიქრები იმაზე, რომ ცუდი დედა ხართ
- საკუთარი უსარგებლობის და ბრალეულობის განცდა
- მკვეთრი აზროვნების და გადაწყვეტილებების მიღების დაქვეითებული შესაძლებლობები
- მძიმე შფოთვები და პანიკური შეტევები
- საკუთარი თავისთვის ან ბავშვისთვის ზიანის მიყენებაზე ფიქრი
- სუიციდზე ფიქრი
არ უნდა გადადოთ ექიმთან ვიზიტი თუ:
- მშობიარობიდან ორი კვირა გავიდა და თავს უკეთესად არ გრძნობთ
- მდგომარეობა უარესდება
- რთული ხდება ბავშვის მოვლა
- გიჭირთ ყოველდღიურ რუტინასთან გამკლავება
- ფიქრობთ საკუთარი თავისთვის ან ბავშვისთვის ზიანის მიყენებაზე
გახსოვდეთ, რომ ექიმები იძლევიან საიმედო პროგნოზს, როდესაც საუბარი ეხება მშობიარობის შემდგომ დეპრესიას!